العربية

تحديث خاص - رفض حُجة الإستثناء في قضية اياد أ

Branch 251
May 6, 2022
5
 MIN
Listen to this episode on your favorite platform
العربية
May 6, 2022
5
 MIN

تحديث خاص - رفض حُجة الإستثناء في قضية اياد أ

مسؤولون سوريّون متّهمون بالتعذيب وبجرائم حرب قيد المحاكمة في مدينة كوبلينز بألمانيا

نعود اليوم بتحديث مهم وقصير: محكمة العدل الفيدرالية في المانية ترفض حُجّة استئناف إياد أ بعد إدانته في فبراير 2021

في هذه الحلقة الخاصة ، نُلَخِص ونحلل قرار محكمة الاستئناف وننظر اليه بنطاق أوسع: ماذا يعني القرار بالنسبة لإياد أ. نفسه ، والوقت الذي سيقضيه في السجن؟ وماذا يعني ذلك بالنسبة للنضالات من أجل تحقيق وجلب العدالة والمساءلة في سوريا وللسوريين والسوريات، لا سيما في هذه الأوقات التي يتم فيها "التطبيع" نظام الأسد؟

حلقة النطق في الحكم: إياد أ

https://www.branch251podcast.com/episode/arabic-updates-episode-koblenz-verdict-eyad-branch251


حلقة احتمالات الحياة بعد السجن

https://www.branch251podcast.com/episode/arabic-season-two-episode4-life-after-prison-branch251

Episode Transcript

 

اهلا فيكم بحلقة خاصة من بودكاست الفرع 251, جرائم حرب سورية قيد المحاكمة، انا سليم، منتج النسخة العربية من البودكاست…  

رجعنالكم اليوم بعد آخر حلقة نشرناها بشهر واحد من سنة 2022, بعد ما تم اصدار الحكم النهائي في قضية أنور ر. حتى نعطيكم تحديث قصير، لكنه مهم متعلق ب إياد أ.


سابقا خلال هالأسبوع ، متل ما عالأغلب سمعتوا او قرأتوا، نشرت محكمة العدل الفيدرالية في ألمانيا قرارها في قضية الاستئناف الخاصة بـشريك انور ر، إياد أ.


يمكن بتتذكروا انه الحكم في قضية اياد تم اقراره بعد تقريبا 10 اشهر من بداية محاكمة الخطيب في كوبلنز، تحديدا بتاريخ 24 /2/ 2021. كان هذا أول حكم في قضية جنائية ضد مسؤولين سابقين في النظام السوري بتهمة ارتكاب جرائم ضد الإنسانية.


المحكمة قررت بالضبط ما يلي: النظام السوري ارتكب جرائم ضد الإنسانية.  وكان إياد أ. أحد منفذي هاي الجرائم عن رضى واقتناع تام، ويلي اتمثلت بهجوم واسع النطاق وممنهج على المواطنات والمواطنين المدنيين.

اليوم الي تم فيه إصدار هذا الحكم كان يوم كبير ومهم لكتار، وخاصة الضحايا او الناجيين أو الشهود السوريين الي شاركوا في بناء وتقديم هالقضية والمحاكمة. وبنفس الوقت، كانت هاي بداية نقاش مكثف بين العديد من يلي كانوا يتابعوا يلي كان يصير في قاعة محكمة كوبلنز.


يمكن بتتذكروا كمان، كيف كان كتار بيتسائلوا عن اذا كانت إدانة ضابط نظام منخفض الرتبة نسبيًا - كرمز لجرائم النظام الأكبر والأوسع - كان قرار او ادانة صحيحة او مفيدة، او اذا كان فعلا الاشي يلي بيحتاجة السوريين/ ات هلا؟!

ناقشنا الكلام هاد وسمعنا اصوات سوريات وسوريين بوقتها، وألقينا نظرة على هذا النقاش ، الي بيطرح تساؤلات متعلقة بمعنى العدالة وشو ممكن أنها تقدم في سياق قانوني محدود. إذا كنتوا مهتمين تسمعو الحلقة بتلاقوا رابطها بالوصف المكتوب.


بالرجوع لموضوعنا الاساسي، اليوم، و بأواخر شهر اربعة من سنة 2022، قررت محكمة العدل الفيدرالية في ألمانيا أنه قُضاة كوبلنز ما ارتكبوا أي خطأ قانوني لما أصدروا حكمهم باعتبار اياد أ. مذنب، و يلي حاول انه يستأنف هالقرار تحديدا بما يخص مدة العقوبة الخاصة فيه، ويلي كانت 4 سنوات و 6 شهور. لكن محكمة الاستئناف أشارت إنه تفسير محكمة كوبلنز وتطبيقهم للقانون هو تطبيق وقرار صحيح. 

بوقتها المحكمة اساسا كانت مخففة عقوبة إياد أ، لأنه ساعد فعليا في القضية ضد شريكه المتهم أنور ر. من خلال تقديم معلومات وأدلة ضده. محكمة كوبلنز وقتها أخدت في الاعتبار هالموضوع لما حددوا مدة عقوبته، ويلي متل ما ذكرت صفّت على 4 سنوات و 6 شهور، الاشي يلي جماعات كتيرة تانية اعتبروها مدة عقوبة منخفضة لشخص مُدان بارتكاب جرائم ضد الإنسانية.

بكل الأحوال، مع قرار قضاة الاستئناف هاد، الآن منقدر نحكي انه الحكم في قضية إياد أ الفردية صار حكم نهائي تمامًا، وما في اي خيارات تانيه للاستئناف، باستثناء استئناف قرار المحكمة هاي نفسه، وهو شيء غير مرجح في هاي القضية، بس طبعا صعب نستبعد اي اشي.

من المحتمل أنه إياد أ. يغادر السجن قريبا بكل الاحوال، اذا بدنا نتفرج على مدة الحكم الكاملة الي صدرت بحقه: اربع سنوات وست اشهر، بنلاقي انه مرّ أكثر من سنه على صدور هالحكم. وبنضيف عليه المدة الي قضاها في الحبس الاحتياطي قبل ما تبدأ المحاكمة، والي كانت كمان أكثر من سنه، واخيرا مدة العشر شهور التي قضاها في الحجز خلال محاكمته، كل هاد رح يخليه قريبا رجلاً حر خارج القضبان، طبعا شو بتعني كلمة حُرّ اله ولعيلته، فهاد سؤال تاني، وكمان القينا نظرة معمّقة على اجابته في موسمنا السابق والاخير من البودكاست. رح تلاقوا الرابط الخاص بهالحلقة بالوصف المكتوب.


بالنهاية، ومع التأكيد على صغر حجم قضية اياد أ. الفردية، بإمكاننا اليوم نعلن بعبارات قانونية مؤكدة - وبسبب صدور الحكم على قضية الإستئناف، أنو النظام السوري ارتكب بالفعل جرائم ضد الإنسانية خلال تصديه للثورة وتحديدا بهديك الفترة. قضاة كوبلنز اعطوا قرارهم بهاد الخصوص بشهر 2 من سنة 2021، والآن رجع تم التأكيد على هذا القرار من قبل محكمة العدل الفيدرالية في ألمانيا. القرار هاد هلا حقيقة قانونية، وتذكير مهم لجميع الدول والمنظمات الدولية ووسائل الإعلام يلي عم تمارس "التطبيع" مع النظام الحالي، ضاربين بعرض الحيط الاعتبارات والواقع اللي عاشوه ولسا عم يعيشوه المدنيين والمدنيات داخل وخارج البلاد… 

بعيد عن الفرع 251، لكن مش بعيد عن المحاكمات والقضايا المتعلقة بالجرائم ضد الإنسانية في سوريا، عم نشتغل حاليا ب 75 بودكاست على بودكاست جديد رح نبلّش بنشره قريبًا، تابعونا عبر كافة منصات الاستماع حتى توصلكم آخر التحديثات!

John Carter
Tech Vlogger & YouTuber

Lorem ipsum dolor sit amet, consectetur adipiscing elit. Ipsum blandit at sed a, vulputate eget. Integer in egestas rutrum risus tortor. Augue sed ac magna semper vitae, orci morbi auctor. Diam dui ut ut purus aenean volutpat.